Հաղթանակ ծանր հանցագործությունների մեջ մեղադրվող օտարերկրացի մեր 6 պաշտպանյալների գործով
Ճիշտ ընտրված պաշտպանական մարտավարության, նախաքննություն իրականացնող ՀՀ քննչական կոմիտեի քննիչի և հսկողություն իրականացնող դատախազի ցուցաբերած օբյեկտիվ մոտեցման շնորհիվ մեղադրյալներին ՀՀ քրեական օրենսգրքի 319-րդ հոդվածի 1-ին մասով, 257-րդ հոդվածի 3-րդ մասի 1-ին և 3-րդ կետերով, 285-րդ հոդվածի 2-րդ մասի 1-ին և 3-րդ կետերով, 296-րդ հոդվածի 3-րդ մասի 1-ին և 3-րդ կետերով (հանցավոր կազմակերպությանը մասնակցելու, հանցավոր կազմակերպության կողմից առանձնապես խոշոր չափերով համակարգչային հափշտակություն կատարելու, հանցավոր կազմակերպության ղեկավարի առաջադրանքով իրավաբանական անձ համարվող ընկերությունների ապօրինի գործունեությանն օժանդակելու և հանցավոր կազմակերպության կողմից առանձնապես խոշոր չափերով փողերի լվացում կատարելու համար) ներկայացված մեղադրանքները նախաքննության ավարտական փուլում հօգուտ մեղադրյալների փոփոխվել են՝ մեղադրանքներից հանելով ՀՀ քրեական օրենսգրքի 285-րդ հոդվածի 2-րդ մասի 1-ին և 3-րդ կետերով և 296-րդ հոդվածի 3-րդ մասի 1-ին և 3-րդ կետերով նախատեսված հանցանքների կատարումը:
Կալանքից ազատում Վերաքննիչ քրեական դատարանի որոշմամբ
2025թ. մարտի 1-ին Երևան քաղաքի առաջին ատյանի ընդհանուր իրավասության քրեական դատարանը ծանր հանցագործության /ծանրացուցիչ հանգամանքներում թմրամիջոցի իրացում/ կատարման մեջ մեղադրվող մեր վստահորդ Է.Ն.-ի նկատմամբ որպես խափանման միջոց կիրառել էր կալանքը՝ 2 ամիս ժամկետով: 2025թ. ապրիլի 10-ին ՀՀ վերաքննիչ քրեական դատարանը բավարարել է փաստաբան Էդգար Այվազյանի կողմից ներկայացված հատուկ վերանայման բողոքը, մեր վստահորդին ազատ արձակել կալանքից՝ նրա նկատմամբ որպես խափանման միջոցներ կիրառելով տնային կալանքը և բացակայելու արգելքը:
ԴԱՏԱՐԱՆԸ ՄԵՐԺԵՑ ՎԻՐԱՎՈՐԱՆՔԻ ՈՒ ԶՐՊԱՐՏՈՒԹՅԱՆ ՀԱՄԱՐ ՄԵՐ ՎՍՏԱՀՈՐԴԻՆ ՊԱՏԱՍԽԱՆԱՏՎՈՒԹՅԱՆ ԵՆԹԱՐԿԵԼՈՒ ՊԱՀԱՆՋՈՎ ՀԱՅՑԸ
Ավելի քան երկու տարի տևած դատական քննությունից հետո ՀՀ Երևան քաղաքի առաջին ատյանի ընդհանուր իրավասության քաղաքացիական դատարանը (դատավոր` Ալֆրեդ Վարդանյան) ԵԴ/3181/02/23 քաղաքացիական գործով մերժեց մեր վստահորդ Արամ Միքաելյանին զրպարտության ու վիրավորանքի համար պատասխանատվության ենթարկելու պահանջով դատարան ներկայացված հայցը:
Վարչական դատարանը պարտավորեցրեց Երևանի քաղաքապետարանին ճանաչել մեր վստահորդի սեփականության իրավունքը
Մեր գրասենյակի վստահորդ Ա.Գ.-ն դիմել էր Երևանի քաղաքապետարան՝ խնդրելով վերականգնել իրեն պատկանող բնակելի տան և դրա համար առանձնացված հողամասի հողհատկացման հիմքերը: Սահմանված ժամկետում Երևանի քաղաքապետից այդպես էլ պատասխան չստանալով՝ փաստաբան Էդգար Այվազյանի կողմից հայցադիմում է ներկայացվել ՀՀ վարչական դատարան: Վարչական դատարանը 2025թ. ապրիլի 7-ին, քննելով հայցադիմումը, ամբողջությամբ բավարարել է այն՝ պարտավորեցնելով Երևանի քաղաքապետին տրամադրել մեր վստահորդի սեփականության իրավունքը վերականգնելու վերաբերյալ որոշումը /վարչական գործ թիվ ՎԴ/7416/05/24/:
Արտասահմանյան ընկերությունը կկարողանա իրացնել իր դատական պաշտպանության իրավունքը ՀՀ-ում
«Էլ Էս Էյ» իրավաբանական ընկերությունը ներկայացնում է նաև օտարերկյա իրավաբանական անձանց շահերը ինչպես վեճերի լուծման արտադատական փուլում, այնպես էլ ՝ ՀՀ դատարաններում։
Հերթական անգամ օտարերկյա դատական ակտի ճանաչման և կատարման թույլատրելու վերաբերյալ դիմումը երկու և ավելի անգամ վերադարձվում էր ընդհանուր իրավասության առաջին ատյանի քաղաքացիական դատարանի կողմից՝ ձևական և տեխնիկական բնույթի պահանջներով, որոնք վերաբերում էին օտարերկրյա պետական մարմինների կողմից տրված փաստաթղթերի բովանդակությանը։ Բողոքարկելով ընդհանուր իրավասության առաջին ատյանի քաղաքացիական դատարանի դիմումը վերադարձնելու որոշումը վերաքննության կարգով, ի վերջո գրանցվեց հաջողություն և վերացվեց վերադարձի վերաբերյալ որոշումը։